1. Je sui aussi com cils qui est ravis,
Qui n'a vertu, sens ne entendement,
Car je ne suis a nulle riens pensis,
Jour ne demi, temps heure ne moment,
Fors seulement a m'amour
Et sans partir en ce pencer de mour
Soit contre moy ; soit pour moy, tout oubli fors
Li qu'aim mieus cent mille fois que mi.
2. Quant je la voy, mes cuers est si espris
Qu'il art et frit si amoureusement
Qu'a ma manière appert et a mon vis;
Et quant loing sui de son viaire gent,
Je languis à grant dolour:
Tant ay désir de veoir sa valour.
Riens ne me plaist; tout fui, tout ay guerpi
Fors li qu'aim mieus cent mille fois que mi.
3. Einsi lonteins et pres langui toudis,
Dont changiés sui et muez tellement
Que je me doubt que n'en soie enhaïs
De meinte gent et de li proprement.
Et c'est toute ma paour;
Car je n'i sçay moien, voie ne tour,
Ne riens n'i puet valoir n'aidier aussi
Fors li qu'aim mieus cent mille fois que mi.
