1. L'autrier par la matinee,
entre un bois et un vergier,
une pastore ai trouvee
chantant por soi envoisier.
Et disoit un son premier :
«Ci me tient li max d'amors.»
Tantost cele part me tor,
que je l'oï desresnier;
si li dis sanz delaier :
«Bele, Dex vos dont bon jor.»
2. Mon salu sanz demoree
me rendi et sanz targier.
Mult ert fresche [et] coloree,
si m'i plot a acointier :
«Bele, vostre amor vous qier,
s'avroiz de moi riche ator.»
Ele respont : «Tricheor
sont mès trop li chevalier.
Melz aim Perrin, mon bergier,
que riche honme menteor.»
3. «Bele, ce ne dites mie;
chevalier sont trop vaillant.
Qui set donc avoir amie
ne servir a son talent
fors chevalier et tel gent ?
Mès l'amor d'un bergeron
certes ne vaut un bouton.
Partez vos en a itant
et m'amez; je vous creant :
de moi avrez riche don.»
4. «Sire, par sainte Marie,
vous en parlez por noiant.
Mainte dame avront trichie
cil chevalier soudoiant.
Trop sont faus et mal pensant;
pis valent que Guenelon.
Je m'en revois en meson,
car Perrinez, qui m'atent,
m'aime de cuer loiaument.
Abessiez vostre reson.»
5. G'entendi bien la bergiere,
qu'ele me veut eschaper.
Mult li fis longue proiere
mès riens n'i poi conquester.
Lors la pris a acoler,
et ele gete un haut cri :
«Perrinet, traï ! traï !»
Du bois prenent a huper;
ja la lais sanz demorer,
seur mon cheval m'en parti
Quant ele m'en vi aler,
si me dist par ramposner :
«Chevalier sont trop hardi !»
